«КазАзот» АҚ теміржол вагондары паркі жаңа вагон-цистерналармен толықты
13 маусым 2021 жылы «КазАзот» зауыты аумағында Маңғыстау облысы әкімінің бірінші орынбасары Абзал Мендибаевич Мендибаевтың қатысуымен жаңа инвестициялық жоба таныстырылды. Жоба аясында сұйық аммиакты тасымалдауға арналған 30 цистерна сатып алынып, пайдаланыла бастады. Әр цистернаның жүк көтеру қабілеті 56 тоннаны құрайды. Жобаның құны — 711 миллион теңге.
«КазАзот» акционерлік қоғамы Қазақстандағы азотты минералды тыңайтқыштардың, соның ішінде аммиактың жалғыз өндірушісі болып табылады. Аммиак химия өнеркәсібінің ең маңызды өнімдерінің бірі болып саналады және минералды тыңайтқыштар мен құрамында азоты бар көптеген өнеркәсіптік заттарды өндіруге арналған шикізат болып табылады.
Аммиакты тұтынушыға жеткізу «КазАзот» компаниясының өндірістік циклінің ажырамас бөлігі болып табылады. Аммиак өндірушісі ретінде Компания оның өндірісі мен сақталуы кезінде барлық қажетті қауіпсіздік шараларын сақтайды. «КазАзот» АҚ теміржол цистерналары сертификатталған және міндетті тексерулерден жүйелі түрде өтіп тұрады.
Жаңа цистерналардың сатып алынуы аммиактың уақтылы жөнелтілуін және тұтынушыға жеткізілуін қамтамасыз етеді. Қазіргі уақытта Компания тәулігіне 650 тонна аммиак өндіреді. Теміржол цистерналары паркін толықтыру өндірісті тәулігіне 750 тоннаға дейін арттыруға мүмкіндік береді.
Автор: «КазАзот» АҚ баспасөз қызметі
